November 2024

Nohamafisin'i Jesôsy ny fahefan'ny Soratra Masina tao anatin'ny adihevitra iray nifanaovany tamin'ireo mpitondra fivavahana. Raha dinihina vetivety dia toa tsy ilaina ny hanaovany izany satria efa nino ny Soratra Masina rahateo ireo mpitondra fivavahana ireo. Saingy tian'i Jesôsy ny hanasongadina ny fahefan'ny Soratra Masina, na dia amin'izy ireo aza, mba hanehoana aminy hoe Iza moa Izy na toy inona na toy inona hamafin'ny fony, na manohitra mafy aza izy ireo andrao ho resy lahatra.

Ankoatra ireo famantarana manokana sy fanambarana resahin'i Jaona mba hanehoana ny maha-Mesia an'i Jesôsy , dia nampiasainy koa ny fahefan'ny Soratra Masin'ny Testamenta Taloha sy ny faminaniana ao anatiny, izay nanambara mialoha ny asan'i Kristy. Manan-danja lehibe ny Testamenta Taloha, tsy ao amin'ny filazantsaran'i Jaona ihany fa ao amin'ny Testamenta Vaovao manontolo. Ny mombamomba an'i Jesôsy , Iza Izy? Avy aiza? Inona no nataony? Ary inona no hataony? - izany dia voamarina ao amin'ny Soratra Masina avokoa, izany hoe ny TT raha ny tontolon-kevitra eto.

Ankoatra ireo fahagagana manokana notantarain'i Jaona mba hanehoana ny maha-Mesia an'i Jesôsy , dia nomeny toerana lehibe koa ny amin'ireo adihevitra mikasika ireo famantarana sy asa ary fahagagana nataon'i Jesôsy.

Hodinihana mandritry ny herinandro : Jao. 5:17,20,36-40,46,47; Jao. 13:18; Jao. 17:12; Jer. 2:13; Zak. 9:9; Jao. 8:12-30.

Tsianjery: "Fa Izaho kosa manana fanambarana lehibe noho Jaona; fa ny asa nomen'ny Ray Ahy hovitaiko, dia izany asa ataoko izany no manambara Ahy fa nirahin'ny Ray." - Jao. 5:36.

Vakio "Ny Nanaterana an'i Isaka ho Fanatitra", toko faha- 13 ao amin'ny PM ary ny "Tao amin'ny fitsaran'i Pilato" ao amin'ny IFM, toko faha-77.

Niankohoka teo an-tongotr'i Jesôsy i Tômasy ka niantsoantso hoe: "Tompoko sy Andriamanitro!"

Raha manolotra vavolombelona maro izay manambara an'l Jesôsy i Jaona, dia mitondra antsika ho amin'izao fandravonana izao izany: "Ary nisy famantarana maro hafa koa nataon'i Jesôsy teo imason'ny mpianatra, izay tsy voasoratra amin'ity boky ity, fa voasoratra izao, mba hinoanareo fa Jesôsy no Kristy, Zanak’Andriamanitra, ary mba hanananareo fiainana amin'ny anarany, raha mino hianareo." - Jao. 20:30,31.

AaVakio ny Jao. 20:19-31. Inona ny lesona mikasika ny finoana sy ny fisalasalana azontsika sintonina avy amin'ny tantaran'i Tômasy? Inona ny fahadisoana lehibe nataony?

Imbetsaka i Jaona no nitantara mikasika ny fiezahan'ireo mpitondra fivavahana hisambotra an'i Jesôsy sy hitondra Azy hotsaraina, ary ny hanameloka Azy ho faty. Lohahevitra iray ao amin'ny filazantsaran'i Jaona ny filazan'i Jesôsy matetika fa tsy mbola tonga ny fotoany, izany hoe ny fotoana hanomboana Azy amin'ny hazo fijaliana (Jao. 2:4; Jao. 7:6,8,30; Jao. 12:7,23,27; Jao. 13:1; Jao. 17:1).

Efa tonga ny fotoana ankehitriny. Nosamborina tao an-tsahan'i Getsemane i Jesôsy , ary nentina teo amin'i Anasy, avy eo tany amin'ny Kaiafa mpisoronabe, ary nentina indroa teo amin'i Pilato.

Enina andro mialoha ny Paska, dia tonga namangy an'i Maria sy i Marta ary i Lazarosy anadahiny (ilay natsangany tamin'ny maty) i Jesôsy. I Simona, ilay nositranina tamin'ny habokana, no nampiantrano ny lanonana ho fankasitrahana ny zavatra nataon'i Jesôsy taminy. Nanompo i Marta fa i Lazarosy kosa nipetraka teo amin'ny latabatra niaraka tamin'ireo nasaina (Jao. 12:1-8). 

Inona no dikan'ny fihetsik'i Maria teto? Ahoana no mahatonga izany ho fijoroana ho vavolombelona maneho hoe iza tokoa i Jesôsy? Jao. 12:1-3.

Tsy menatra nanambara ny maha-Izy Azy na niantso vavolombelona hanambara ny momba Azy I Jesôsy , eny fa na dia efa nodimandry efa ela aza izany vavolombelona izany, anisan'izany i Abrahama. "Ravoravo Abrahama rainareo hahita ny androko; ary nahita izy ka faly." - Jao. 8:56.

Nahoana no zava-dehibe tokoa ny fijoroan'i Abrahama ho vavolombelona ka nampidirina tao amin'ny filazantsaran'i Jaona mihitsy? Gen. 12:3; Gen. 18:16-18; Gen. 26:4; Mat. 1:1; Ma. 3:25.