Lesona Sekoly Sabata Herinandro

Hodinihina mandritra ny herinandro: Jer. 29:23,24; Sal. 139:1-6; Dan. 12:4; Apôk. 22:10; 2 Tim. 3:15-17; Heb. 4:12.

Tsianjery: "Fa izay te-hirehareha dia aoka hirehareha amin'izao: dia ny fahendreny sy ny fahalalany Ahy ho Jehôvah , Izay manao famindrampo sy fitsarana marina ary fahamarinana ety ambonin'ny tany; fa izany no sitrako, hoy Jehôvah ." - Jer. 9:23

Tsy mitovy hevitra ny Kristianina momba ny faminaniana, toy izany koa mahakasika ny ankamaroan'ireo lohahevitra hafa ao amin'ny Soratra Masina. Matetika izany no mitondra faharesen-dahatra izay mahatonga ny hafa hihevitra fa fandaniam-potoana ny faminaniana ara-Baiboly. Ahoana tokoa moa no itokiana ny fahamarinan'ny faminaniana raha toa mampiady hevitra ny Kristianina ny tsipiriany madinika rehetra momba izany? Indrisy fa marobe ny mpino manomboka mihevitra koa fa tsy mety ho takatry ny saina ny boky sasany ao amin'ny Baiboly, toy ny Apokalipsy. Tsy mamaky ireny boky ireny izy ireo fa mandositra izany; ary indraindray aza izany dia vokatry ny fandrisihana amim-pitiavana ataon'ny Pasitora noho ny fiheverany fa miteraka olana kokoa fa tsy mamaha olana ny fandinihana ny faminaniana.

Tsy tahaka izany mandrakariva anefa no niseho tamin'ny lasa. Nandritra ireo taonjato valo ambin'ny folo voalohany teo amin'ny tantaran'ny fivavahana kristianina, dia nifankazatra tanteraka tamin'ny faminanian'ny Baiboly ny ankamaroan'ny Kristianina, ary nahagaga ny fitovian-kevitra hita teo amin'izy ireo mahakasika ireo hafatra manan-danja ao amin'ny faminaniana. Izany tokoa no nokasain'Andriamanitra: "Ary mananatra anareo aho, ry rahalahy, amin'ny anaran'i Jesôsy Kristy Tompontsika, mba hiray teny ianareo rehetra, ka tsy hisy fisarahana eo aminareo, fa mba ho tafakambana tsara ianareo hiray saina sy hevitra." 1 Kôr. 1:10.

Hodinihintsika mandritra ity herinandro ity ireo fitsipika sasantsasany hahafahana mahatakatra ny faminaniana amin'ny fomba tsy miovaova sy azo antoka.

*Famerenana ny lesona ny sabata 05 Aprily.

Nosoratan'i Shawn Boonstra

Ireo famantarana ao anatin'ny faminaniana

Nandritra ny adin'ny Golfe Persique voalohany (1991) dia resy lahatra ny mpanoratra sy mpandaha-teny Protestanta malaza iray fa efa naminany ny amin'io fifandonana io ny bokin'ny Apokalipsy. Ny sasany tamin'ireo angidimby niasa nandritra ny ady mantsy dia nitovy tamin'ireo valala voalaza ao amin'ny Apokalipsy, ary naoriny tamin'izany ny fanazavany. «Ary nanokatra ny lavaka tsy hita noanoa izy, dia nisy setroka niakatra avy tamin'ny lavaka, tahaka ny setroka avy amin'ny lafaoro lehibe, ary tonga maizina ny masoandro sy ny habakabaka noho ny setroka avy tao amin'ny lavaka. Ary nisy valala nivoaka avy tamin'ny setroka nankamin'ny tany; ary nomena hery ireny, tahaka ny herin'ny maingoka amin'ny tany.» - Apok. 9:2,3.

Tsy dia izany loatra no fomba tsara indrindra hanazavana ny faminaniana ara-Baiboly, sa ahoana hoy ianao? Kanefa fahita mahazatra ihany izany fomba fanazavana izany. Raha ny marina dia efa am-polo taona maro no nisy boky. lahatsoratra, horonan-tsary marobe, ary ankehitriny tranonkala maro amin'ny aterineto, natokana handinihana ny faminaniana, izay nanao fanambarana maro momba ny hoavy, anisan'izany ny fametrahana daty mifandraika amin'ireo tranga amin'ny andro farany - izay matetika nifantoka tamin'ny ady na ny korontana any Moyen-Orient.

Ary, tsy mahagaga, tsy nisy tanteraka ireo rehetra ireo.

Amin'ny maha-Advantista Mitandrina ny Andro Fahafito antsika dia hafa ny fomba itondrantsika izany. Mifantoka amin'i Kristy isika, Izay ivon'ny faminaniana, ary tsy mitodika intsony amin'ny toerana ara-jeografia tokana any Moyen-Orient sy izay fifandonan'ny tafika miseho any ny faminaniana. Ao anatin'ny tontolon-kevitry ny fifanandrinana lehibe ifanaovan'i Kristy sy i Satana kosa no andinihantsika ny faminaniana ady ara-panahy maneran-tany izay ho tonga amin'ny faratampony rehefa hiatrika ny fotoan-tsarotra farany ny vahoakan'Andriamanitra, na Jiosy na tsia (jereo ny Apôk. 12:17, Apôk. 14:12). Ny fiankohofana amin'ny Mpahary (jereo ny Apok. 14:7), izay mifanohitra amin'ny fiankohofana amin'ny bibidia sy ny sariny, no ifanolanana amin'izany.

Singa fototra ahatakarana ireo faminaniana amin'ny andro farany ireo ny Daniela 2, izay tsy vitan'ny mirakitra ny filaharan'ireo faminaniana ara-tantara ihany fa ahitana singa manan-danja hoenti-manazava ny heviny koa.

Manoritsoritra fanjakana efatra eto amin'izao tontolo izao ny Daniela 2 -Babilona, Media-Persia, Grisia, ary Rôma arahin'ny fanorenan'Andriamanitra ny fanjakany mandrakizay, "izay tsy ho rava mandrakizay; ary izany fanjakana izany tsy havela ho an'olon-kafa, fa ireo fanjakana rehetra ireo dia hotorotoroiny sy holevoniny, fa izy kosa hitoetra mandrakizay." - Dan. 2:44. Mitovy ny firafitra fototry ny faminaniana ao amin'ny Daniela 2 sy ny ao amin'ny Daniela 7 sy 8, dia ny fisandratan'ireo fanjakana eto an-tany sy ny faharavany mandra-piorenan'ny fanjakan'Andriamanitra mandrakizay.

Manazava izany rehetra izany ilay anjely ao amin'ny Daniela 7: "Ireo biby lehibe efatra ireo dia mpanjaka efatra izay hitsangana avy amin'ny tany. Nefa ny olo-masin'ny Avo Indrindra no hahazo ny fanjakana ary hanana ny fanjakana mandrakizay alaovalo." - Dan. 7:17,18.

Mifanesy, mifandimby tsy misy fiatoana eo amin'ny tantara ireo fanjakana efatra eto an-tany (Babilona, Media-Persia, Grisia, ary Rôma) mandra-panorenan Andriamanitra ny fanjakany mandrakizay amin'ny fiavian'i Jesosy fanindroany.

Mazava loatra, mbola eto isika izao, ao anatin'ny fotoana anjakan'i Rôma, ilay fanjakana fahefatra farany eto an-tany alohan'ny fiverenan'i Kristy.

Araka io fomba fijery ara-tantara io, izay fototra ahatakarana ny faminaniana, no handinihantsika ny lohahevitra mikasika ny fomba fanazavana ny faminaniana ara-Baiboly mandritra ity telovolana ity, indrindra ny sasany amin'ireo fanoharana, tantara, sary an'ohatra, ary tandindona izay manambara fahamarinana ara-paminaniana sy izay hitranga any am-parany any.

Hatombotsika amin'ny tantaran'ny Famoronana ao amin'ny Genesisy izany izay zava-dehibe ho an'ny fahatakarana ny faminaniana, ary indrindra koa ny hazo fijaliana sy ny fahafatesan'i Jesosy ho fanavotana ny olona - ka hatramin'ny tilikambon'i Babela, ny fanompoam-pivavahana ao amin'ny fitoerana masina, ny Salamo, ary na dia ny sasany amin'ireo fanambadiana ao amin'ny Testamenta Taloha aza. Ao amin'ireo rehetra ireo, sy ny maro hafa, dia hahita sary an'ohatra, tandindona, ary fanoharana isika, izay rehefa dinihina amim-bavaka sy amin'ny toe-tsaina manetry tena sy milefitra (ho lany andro fotsiny ianao raha amin'ny fo feno fanoherana no andinihanao ny Baiboly), dia hanampy antsika hahatakatra mazava ireo faminaniana amin'ny andro farany, indrindra ny ao amin'ny Apôkalipsy.

Tsy isalasalana fa tsy ampy ny telovolana iray hanombohana ny fandinihana ny tantara sy ny sary rehetra izay manampy amin'ny fahatakarana ny fahamarinana ara-paminaniana. Iza no mahalala? Fotoana mandrakizay angamba no hilaintsika amin'izany. Eto am-piandrasana dia handinika izay rehetra azontsika dinihina isika, miaraka amin'ny fahasoavan'Andriamanitra.

I Shawn Boonstra dia mpandaha-teny/talen'ny Departemantan'ny Feon'ny Faminaniana. Nampahery izao tontolo izao ny fandaharany sy ny boky nosoratany, ary naseho mivantana tany amin'ny kaontinanta rehetra ny hetsika fitoriana ny filazantsara nataony nandritra ny taona maro, afa-tsy tany Antarktika.

Midira ao amin'ny trano fivarotam-boky kristianina iray ary jereo ny lohatenin'ireo boky momba ny faminanian'ny Baiboly ao. Tsy ho ela akory dia ho talanjona ianao fa hahita karazana fomba fijery sy fanazavana maro samy hafa, ary mety halaim-panahy ianao hino fa tsy misy olona tena mahatakatra izay voalazan'ny boky tahaka ny Apokalipsy. Ambaran'ny mpanoratra iray, ohatra, fa ny antikristy dia tsy hafa fa sary an'ohatra ihany; misy hafa indray milaza fa mbola ho avy izany; ary ny mpanoratra iray hafa dia manambara fa manondro zavatra na olona iray tamin'ny andron'ny fanjakan-dehibe rõmanina jentilisa izany. Izao no nambaran'ny mpitoriteny efa antitra anankiray: "Azo heverina ho toy ny lokanga tranainy iray ny Baiboly ka samy afaka mitendry izay feon-kira tiany hotendrena aminy ny olona."

Tsy manambara zavatra tahaka izany momba ny tenany anefa ny Baiboly. Tsy İzany, fa asainy isika hamaky, ao anatin'ny fieritreretana fa tsy foana tsy akory no itenenan Andriamanitra ary koa azontsika atao ny mahafantatra ny fahamarinana izay ambarany amin'ny alalan'ny Teniny.

Vakio ny Mat. 24:15; Apôk . 1:3; Mat. 11:29 ary ny Jer. 9:23,24. Inona no ambaran'ireo toko sy andininy ireo momba ny fikasan'Andriamanitra hahatakarantsika ny Teniny?

Oniversite maro no mampianatra momba "ny Baiboly amin'ny maha-literatiora azy", na ny mitovy amin'izany. Mety ho gaga ny mpino raha manatrika fampianarana mandritra ny ora maro nefa tsy handre afa-tsy ny famakian'ny mpampianatra ny Baiboly tahaka ny famakian'ny olona iray anganon'ny mpanompo sampy. Izao no hevitra tiany havohitra: misy "fahamarinana" ara-môraly bitika ihany azo tsoahina avy amin'ireo tantara ao saingy afaka manao izay tiany mahakasika izany ny mpamaky. Mampihomehy ireny mpampianatra ireny ny filazana fa avy tamin'ny tsindrimandrin'Andriamanitra io boky lo.

Araka izany, mamaky ny Baiboly izany mpampianatra izany saingy tsy mandre ny feon'Andriamanitra miteny. Misy olona manatsoaka hevitra mifanohitra mazava amin'ny hafatry ny Baiboly. Rehefa tsy milefitra eo anatrehan'ny Tompo sy manokatra ny fony hianatra ny fahamarinana ny olona mamaky ny Baiboly, dia azo inoana tokoa fa sady tsy haharay ny hafatra voarakitra ao no tsy hahatakatra araka ny tokony ho izy ny toetran'Andriamanitra masina sy be fitiavana izay asehon'ireo takila ao. Mora kokoa noho izay mety heverin'ny maro ny hahatonga izany amintsika. Izany no mahatonga ny famakiana fotsiny ny Baiboly tsy arahin'ny fitaovana mifandraika amin'izany ary indrindra ny toe-tsaina tokony hanaovana azy, eo ambany fitarihan'ny Fanahy Masina, hampidi-doza.

Nisy olona fantatry ny maro fa tsy mpivavaka namaky Balboly. Izao no navaliny rehefa nanontaniana momba izay nataony izy: "Mitady ny lesoka madinika tsy hinoana izay voalaza ato aho." Izany tokoa no toe-tsaina tsy mety manoloana ny famakiana ny Tenin'Andriamanitra; nahoana?

Tsy misy zavatra miteraka fahasorenana tahaka ny filan'ny olona iray miresaka amin'olona, ao amin'ny toeram-pitsaboana na fivarotam-panafody ohatra, raha any amin'ny firenena iray izy nefa zara raha hainy ny fiteny ao. Hainy izay tokony holazainy saingy tsy hitany ny voambolana mahalaza tsara izany.

Olana samy hafa amin'izany no miseho eo amin'Andriamanitra. Hoy Izy: "Fa tahaka ny hahavon'ny lanitra noho ny tany no hahavon'ny lalako noho ny lalanareo sy ny fihevitro noho ny fihevitrareo." Isa. 55:9. Tsy ny tsy fananan'Andriamanitra voambolana hoentina mifandray amintsika no olana fa ny tsy fananantsika voambolana na fahalalana hoenti-manakatra amin'ny fahafenoany izay tiany hambara.

Inona no ambaran'ireto toko sy andininy manaraka ireto momba ny fahasamihafan'ny fahatakaran'Andriamanitra sy ny fahatakarantsika?

Sal. 139:1-6
………………………………………………………………………….………………………………………
Sal. 147:5 ………………………………………………………………………….………………………………………

Rôm. 11:33 ………………………………………………………………………….………………………………………

1 Jao. 3:20 ………………………………………………………………………….………………………………………

Raha ny marina dia tsy ho takatsika amin'ny fahafenoany na oviana na oviana ny fisainan’Andriamanitra noho ny maha-tsy manam-petra sy mahalala ny zavatra rehetra Azy. Raha ny zavatra rehetra momba ny zavaboary aza tsy takatsika tanteraka, ahoana moa no hananantsika fahatakarana feno momba ny Mpamorona azy? Tsy haintsika izany.

Tsy ho takatsika na oviana na oviana ny momba ny zavatra rehetra saingy azontsika takarina kosa izay ilaina ho amin'ny famonjena antsika. (Jereo ny 2 Tim. 3:14,15). Rehefa nanazava momba ny filazantsara tamin'ireo mpamaky ny epistiliny ireo apôstôly dia matetika izy ireo no niresaka momba ny faminaniana efa tanteraka, avy tamin'izany no nanatsoahany hevitra fa anisan'ny tanjona fototry ny faminaniana ny haneho ny drafi-pamonjena. Amin'ny farany, dia tsy maintsy hitarika antsika hankeo amin'i Jesôsy sy ny teny fikasan'ny famonjena izay atolony ny olombelona rehetra ny faminanian'ny Baiboly, na amin'ny fomba ahoana na ahoana.

Nidina teto an-tany tokoa ny Tompo, izay nahariana ny zavatra rehetra (Kol. 1:16; Jao. 1:1-3), ary nanolotra ny Tenany ho sorona teo amin'ny hazo fijaliana noho ny fahotan'ny olombelona rehetra, eny fa na izay fadiranovana indrindra aza. Tahaka izany ny haben'ny fitiavan'Andriamanitra antsika rehetra. Rehefa nanao izay rehetra azony natao ho antsika Izy, dia mazava loatra fa irin'Andriamanitra ny hahalalan'ny olona rehetra ny zavatra atolony ho antsika ao amin'i Jesôsy . Ary ny faminaniana no afaka manatanteraka izany.

Marina fa maro ny zavatra tsy fantatsika, nahoana anefa no zava-dehibe ny mifantoka amin'izay fantatsika sy ny manaraka izany fa tsy sahiran-tsaina loatra amin'izay tsy fantatsika?

Vakio ny Dan. 12:4. Inona no nambaran'Andriamanitra tamin'i Daniela teto? (Ampitahao amin'ny Apôk , 22:10) 

Fandre matetika ny fampiasan'ny mpitoriteny maro ny Dan. 12:4  izay nilaza mialoha ny amin'ny fitomboan'ny fahalalana ara-teknolojia sy ara-tsiansa mialoha indrindra ny fiverenan'i Kristy fanindroany. Maro koa no mampiasa izany hoenti-miresaka momba ny fandrosoana eo amin'ny hafainganam-pandehan'ny fitaovam-pitaterana hatramin'ny taonjato lasa teo. Maro amin'ireo bokintsika no no mar mandray izany hevitra izany. Azo raisina ho fanazavana mitombina tokoa izany, nefa mety ho hafa noho izany koa ny hevitr'io toko sy andininy io.

Vakio indray ilay toko sy andininy. Manomboka amin'izao baiko izao ny toromarika nomen'ilay anjely an'i Daniela: "Ary ianao, ry Daniela, dia ahoroninao ny teny, ka asio tombo-kase ny taratasy." Ny bokin'i Daniela ihany no resahina eto. Araka izany, azo heverina ve fa ny fahalalana io bokin'i Daniela io no hitombo vetivety foana amin'ny andro farany?

Mampiseho ny tsy fitovian'ny bokin'i Daniela amin'ny Apokalipsy izany, izay nilazana tamin'i Jaona mba tsy hanisy tombokase ny bokiny (Apôk. 22:10). Hatramin'ny voalohany. dia natao ho takatry ny olona ny bokin'ny Apokalipsy, satria "antomotra ny andro." Ny bokin'i Daniela kosa dia ho takatra mazava kokoa any amin'ny fotoana hoavy lavidavitra.

Betsaka ny manam-pahaizana kristianina niezaka nanazava ny bokin'i Daniela, tao anatin'ny taonjato maro, ary nanao dingam-pandrosoana lehibe ny sasany tamin'izy ireny. Nitombo haingana ny fahatakarana ny bokin'i Daniela, tamin'ny fiafaran'ny faminaniana momba ny 1260 taona, izay tapitra tamin'ny 1798, rehefa nanomboka nanao tsoa-kevitra ny mpamakafaka ny Baiboly maro fa hisy toe-javatra manaitra hitranga manodidina ny taona 1843. Nisongadina indrindra tamin'ireny anefa i William Miller, izay nanao toriteny nitarika ho amin'ny fihetsehana lehibe mifandraika amin'ny Fiverenan'i Kristy tarmin'ny taonjato faha-19 ary koa nanomboka hetsika nitohitohy izay niafara tamin'ny fahaterahan'ny fiangonana "sisa" sy ny fahatakarana mazava ny hafatry ny anjely telo.

Raha lazaina amin'ny teny hafa, ny fahaterahan'ny fihetsehana maneran-tany izay misy antsika dia ny faminanian'i Daniela izay tanteraka fa "hitombo ny fahalalana" amin'ny "andro farany."

Etsy ankilan'izany kosa, tsy natao hitsarana momba ny famonjena ny olona tsy akory, saintsaino ny amin'ny "haizina" misy ao amin'ny tontolo kristianina ankehitriny. Odian-tsy hita, ary ailika mihitsy aza, ny fahamarinana manan-danja tahaka ny Sabata andro fahafito izay naorina tany Edena ka apetraka eo amin'ny toerany ny Alahady izay naorina tamin'ny andron'ny fanompoan-tsampy romanina. Eritrereto koa ny tsy fahalalan'ny olona na inona na inona mikasika ny fahafatesana. Ny ankamaroan'ny Kristianina dia mino ny hevitra nasisiky ny mpanompo sampy izay milaza fa manidina avy hatrany ho any amin'ny fiainana hafa ny maty, ary ho an'ny hafa indray dia midika ho afobe mirehitra mandrakizay koa izany.

Eo anatrehan'izany, dia tokony ho velom-pankasitrahana isika, ary hanetry tena, noho ny fahalalantsika ny fahamarinana.

Nanampy betsaka ny Advantista ho amin'ny fahatakarana ny faminaniana ara-Baiboly i William Miller. Tsy takany tamin'ny fahafenoany ireo andalan-teny fototra (tahaka ny Dan. 8:14), nefa nanana ny lanjany ny fomba fandalinany satria nanamboatra ny lalana ho amin'ny fahaterahan'ny fihetsehana misy antsika izay sisa amin'ny andro farany.

Vakio ny Mat. 5:18; 2 Tim. 3:15-17 ary ny Lio. 24:27. Inona no ampianarin'ireo toko sy andininy ireo antsika momba ny fomba tokony handinihantsika ny faminanian'ny Baiboly?

Amin'ny lafiny iray, dia azo ampitahaina amin'ny fanambarana piozila lehibe iray ny fandinihana ny Baiboly. Raha ampahana piozila roa na telo monja no atambatrao dia tsy azo heverina mihitsy ny hahalalanao ilay sary iray manontolo avy amin'izany. Mety hahita soavaly ianao eo amin'ireo ampahany roa na telo ireo ka hanatsoaka hevitra fa sarin-tsoavaly no atambatambatrao. Maneho sarin'akoho kely sy omby anefa ny ampahany hafa amin'izany piozila izany, ary rehefa nahatambatra sarisary an-jatony ianao dia hahita amin'ny farany fa sarin-javaboary ilay sary manontolo, izay ahitana tanana sy toeram-piompiana ary tangoron-tendrombohitra eny lavitra eny.

Anisan'ny fahadisoana fototra mpahazo ny Kristianina sasany eo amin'ny fandalinany ny Baiboly ny fandraisany ny Soratra Masina ho toy ny amboaran'ohabolana na fomba fiteny izay azony ampiasainy manoloana ny toe-javatra iray manokana. Ny hafa indray dia mijery ny toromarika madinidinika momba ny fandalinana ny Baiboly ao amin'ny pejy voalohan'ny Baiboly vokarin'ny "Gideons International" izay ahitana toko sy andininy mifanentana amin'ny lohahevitra samihafa, ary amin'izany no iheveran'izy ireo fa izany no mampiseho ny fampianaran'ny Baiboly manontolo mahakasika ny lohahevitra anankiray.

Mampalahelo fa tahaka izany koa no ataon'izy ireo rehefa mandinika ny faminaniana; esoriny avy ao amin'ny tontolon-kevitra misy azy ny andinin-tSoratra Masina iray ary ampitahainy amin'ny toe-javatra mitranga fa tsy amin'ny Baiboly manontolo. Anisany mahatonga ny fisian'ny boky môderina marobe momba ny faminaniana izay mila havaozina isan-taona izany, noho izy ireny ahitana fahadisoana eo amin'izay nolazainy fa hitranga sy ny fotoana hitrangan'izany.

Izany no maha-zava-dehibe tokoa ny tsy fifidianana fotsiny toko sy andininy manokana momba ny lohahevitra iray fa ny fandalinana amim-pitandremana kosa ny zavatra rehetra ambaran'ny Baiboly mahakasika izany lohahevitra izany ary koa ny fandinihana ny tontolon-kevitra manodidina izany. Mora ny misintona andalan-teny hiala amin'ny tontolon-kevitra misy azy ka hamoaka hevitra araka izay tiantsika.

Inona ny fanandramana efa niainanao mahakasika ireo olona mampiasa toko sy andininy sasany nofantenana ka miezaka manazava ny heviny mahakasika ny toetry ny maty, ohatra, na koa ny Sabata? Inona no fomba tsara indrindra hamaliana azy ireny?

Teboka iray manan-danja tokony hataon'ireo izay mandinika ny faminaniana ny famaritana raha toa horaisina ara-bakiteny na ara-keviny ny fomba fiteny ampiasain'ny Baiboly. Ahoana no hamaritana raha toa mamplasa fanoharana ny mpanoratra, ary ahoana no hahalalana ny zavatra tondroin'izany tandindona izany? Tahaka izao ny fomba manan-danja indrindra hanaovana izany: jerena ny fomba nampiasana ilay tandindona manerana ny Baiboly; mifanohitra amin'ny fijerena ny fampiasana ny tandindona iray amin'izao vanim-potoana ankehitriny izao izany. Ohatra, misy olona mahita fa manondro an'i Russie ny sarin'ny bera ao amin'ny Dan. 7 satria matetika io sary io no ampiasaina ankehitriny hoenti-maneho an'i Russie. Tsy fomba azo antoka hanazavana ireo sary an'ohatra ampiasain'ny Baiboly izany.

Diniho ireto toko sy andininy manaraka ireto, ary aoka ny Baiboly ihany no hanazava ny teny ao aminy. Inona ny sary an'ohatra iraisan'ireo toko sy andininy ireo araka ny lohaheviny avy, ary inona no voalazan'ny Baiboly fa tondroin'izany?

Dan. 7:7; Dan. 8:3; Dan. 7:24
………………………………………………………………………….………………………………………
Apôk. 1:16; Efes. 6:17; Heb. 4:12
………………………………………………………………………….………………………………………
Apôk. 12:1; Apôk. 21:2; Efes. 5:31,32; Jer. 6:2
………………………………………………………………………….………………………………………

Rehefa arahina ny fitsipika tsotra, izay mamela ny Baiboly hamaritra ny teny ampiasainy, dia saika tsy misy zava-miafina intsony ao ambadiky ny tandindona ara-paminaniana. Hitantsika, ohatra, fa fahefana ara-pôlitika na firenena iray no tondroin'ny tandroka iray. Maneho ny Tenin'Andriamanitra ny sabatra; ary ny vehivavy dia maneho ny fiangonana. Hitantsika mazava amin'izay fa manazava ny tenany tokoa ny Baiboly.

Misy fanontaniana tokony mbola hovaliana anefa: nahoana Andriamanitra no miteny amin'ny alalan'ny tandindona fa tsy mivantana? Nahoana, ohatra, no tondroin'i Petera amin'ny fomba miafinafina amin'ny hoe "Babylona" ny tananan'i Rôma, ao amin'ny 1 Pet. 5:13?

Mety ho maro ny antony nahatonga an'Andriamanitra nifidy ny hampita hafatra amin'ny alalan'ny tandindona ao amin'ny faminaniana. Raha mahakasika ny fiangonan'ny Testamenta Vaovao, ohatra, raha notondroin'ny Apôkalipsy mazava ho tompon'andraikitry ny faharatsiana maro i Rôma dia azo heverina fa ratsy kokoa noho izay nitranga ny fanenjehana nihatra tamin'ny fiangonana. Na inona na inona anton'izany, dia mahazo matoky isika fa irin'Andriamanitra ny hahatakarantsika ny hevitr'ireny tandindona ireny.

Na dia mitoetra ho zava-miafina aza ny sasany amin'ireo tandindona sy faminaniana, ahoana no mahatonga ny fifantohantsika amin'izay takatsika hanamafy orina ny finoantsika? 

Vakio ny "Mpanavao fivavahana amerikanina", toko faha-18, ao amin'ny HM.

"Nolazain'ny mpitandrina sy ny vahoaka fa ireo faminanian'i Daniela sy ny Apokalypsy dia zava-miafina tsy hay fantarina. Kristy anefa dia nitarika ny mpianany ho amin'ny 'ny andron'izy ireo koa tenin'ny mpaminany Daniela mikasika ireo toe-javatra hitranga amin'ny ka hoy Izy hoe: 'Aoka hisaina izay mamaky izany. -Mat. 24:15. 15. Ary ny fanantitranterana fa zava-miafina ny Apokalypsy, ka tsy mety ho tratran'ny saina, dia mifanohitra amin' anaran'io boky to mihitsy. 'Ny fanambaran'i Jesôsy Kristy, izay nomen'Andriamanitra Azy, mba hasehony amin'ny mpanompony izay zavatra tsy maintsy ho tonga faingana; (...) Sambatra izay mamaky sy mihaino ny tenin'ity faminaniana ity ka mitandrina izay voasoratra ao anatiny, fa antomotra ny andro. - Apôk. 1:3.

"Eo anoloan'ny fanambarana avy amin'ny tsindrimandrin'Andriamanitra, ahoana no ahasahian'ny olona mampianatra fa zava-miafina tsy mety ho takatry ny sain'ny olombelona ny Apôkalypsy? Zava-miafina nambara izany, boky mivelatra. Mitarika ny saine ho eo amin'ireo faminanian'i Daniela ny fandinihana ny Apokalypsy, ary samy manolotra fampianarana lehibe ireo, avy amin'Andriamanitra ho an'ny olombelona, mikasika ireo toe-javatra izay hitranga amin'ny fiafaran'ny tantaran'ity izao tontolo izao ity.

"Novelarina tamin'i Jaona ireo toe-javatra mahaliana fatratra sy mampangitakitaka eo amin'ny fanandramana ataon'ny fiangonana. Hitany ny toerana, ny loza, ny ady sy ny fanafahana farany ny vahoakan'Andriamanitra. Noraketiny an-tsoratra ireo hafatra famaranana izay hahamasaka ny vokatry ny tany, na ho amboara hoentina any amin'ny sompitry ny lanitra na ho kitay hodorana amin'ny afo fandravana. Lohahevitra mavesa-danja no nambara taminy, indrindra ho an'ny fiangonana farany, mba hahazoan ireo izay miala amin'ny fahadisoan-kevitra handray ny fahamarinana, hahazo torolalana ny amin'ny loza sy ny ady manoloana azy. Tsy misy tokony hijanonana amin'ny haizina raha ny amin'izay mikasika ny hitranga eto ambonin'ny tany." - HM, tt. 355, 356, ed. 1983.

Fanontaniana hifanakalozan-kevitra

1. Amin'ny fomba ahoana no hahatonga ny fandinihana ny faminaniana hampitombo ny finoanao? Inona ny faminaniana nampitombo ny fitokianao amin'ny Balboly ary indrindra amin'Andriamanitra izay nanome izany tamin'ny alalan'ny tsindrimandry (faminaniana izay nosoratana an'arivo taona lasa mikasika ireo toe-javatra hitranga zato na arivo taona aty aoriana)? Ahoana, ohatra, no anomezan'ny Dan. 12 antsika antony manan-danja sy ara-lôjika mba hananana toky ny amin'ny fisian'Andriamanitra ary koa ny fahalalany momba ny hoavy?

2. Inona avy ny fomba tsara indrindra hiarovantsika tena amin'ny ezaka ataon'ny olona mba hitondrana fanazavana tsy marim-pototra momba ny faminaniana, eny fa na eo anivon'ny fiangonantsika aza indraindray? Nahoana isika no tokony hitandrina ka hamantatra ny zavatra rehetra ary hihazona mafy izay tsara (1 Tes. 5:21)?