"Fa matoky aho fa na fahafatesana, na fiainana, na anjely, na ireo fanapahana, na zavatra ankehitriny, na zavatra ho avy, na hery, na ny ambony, na ny ambany, na inona na inona amin 'izao zavatra ary rehetra izao, dia tsy hahasaraka antsika amin'ny fitiavan'Andriamanitra izay ao amin'i Kristy Jesôsy Tompontsika." - Rôm. 8:38,39.
Mofon’aina:
Azon'i Kristy natao ny nanalavitra antsika noho ny helotsika, saingy tsy izany fa tonga nonina teto amintsika aza Izy, Izay manana ao Aminy ny fahafenoan'Andriamanitra rehetra, mba ho iray amintsika, mba ho tonga amin'ny fahatanterahana isika noho ny fahasoavany. Tamin'ny fahafatesana mahamenatra sy fijaliana no nanavotany ny olombelona. Fitiavana sy fahafoizan-tena re izany! (...) Tsy misy maharefy ny halalin' izany fitiavana izany. (...) Tian'Andriamanitra haneho ny toetrany sy hanao ny asany ny zanany, mba ho voataona hiray saina amin'Andriamanitra koa ny hafa.
Tonga ota ho famonjena ny taranaka lavo i Kristy Mpamonjintsika, Ilay tonga lafatra tanteraka. Tsy nahalala ota Izy satria tsy nanota, kanefa dia nizaka ny vesatra mahatsiravin'ny helok'izao tontolo izao. Natao sorona ho antsika Izy mba ho tonga zanak'Andriamanitra izay rehetra mandray Azy. (...) Nanao izay hitaomana ny olona rehetra hanatona Azy i Kristy tamin'ny alalan'ny hazo fijaliana. Ny fahafatesany no hany fanantenana hahazoana mamonjy ireo izay latsaka anatin'ny fangidiana noho ny fahotana. Natao handray hery vaovao ara-tsaina sy ara-panahy amin'ny alalan'ny Fanahy Masina ny olona, izay raha miara-miasa amin'Andriamanitra dia ho tonga iray amin'Andriamanitra.
Mba handravana ny sakana napetrak'i Satana eo anelanelan' Andriamanitra sy ny olona dia nanao sorona ampy sy tanteraka i Kristy, naneho fandavan-tena tsy misy toy izany. Nampiseho fahagagana tamin' izao tontolo izao Izy, dia Andriamanitra tonga olombelona sy nanao sorona ny tenany ho famonjena ny olona lavo. Fitiavana mahatalanjona re izany! Mitomany aho eo am-pieritreretana fa maro tokoa ireo izay milaza ho mino ny fahamarinana no milona ao anatin'ny fitiavan-tena (...).
Gaga aho mahita ireo izay mitonona ho Kristianina kanefa tsy manararaotra ny fanomezan'ny lanitra, sy tsy mahita mazava fa ny hazo fijaliana no mitondra famelan-keloka sy mampifandray mivantana ny fo (...) amin'ny Fanahy Masina. UL, t.191.
"Ary ho rakitra soa ho Ahy ireny amin'ny andro izay hotendreko, hoy Jehôvah , Tompon'ny maro, ary ho antra azy Aho toy ny olona antra ny zanani-lahy izay manompo azy." - Mal. 3:17.
Mofon’aina:
Vatosoa sarobidin'i Kristy ny Kristianina, novidiny tamin'ny vidiny tsy manam-petra. Natao hamirapiratra ho Azy izy ireo, hampiely ny fahazavan'ny fahatsarany. Ary tsy azony hadinoina fa ny famirapiratana rehetra eo amin'ny toetra kristianina dia noraisiny avy amin'Ilay Masoandron'ny fahamarinana.
Miankina amin'ny fanefena azy ny famirapiratan'ny vatosoan' i Kristy. Tsy manery antsika hotefena Andriamanitra. Anjarantsika ny mifidy na hotefena isika na tsia. Kanefa tsy maintsy manaiky hotefena izay rehetra omena toerana ao amin'ny tempoly. Tsy maintsy ekeny ny hanesorana izay rehetra maranidranitra eo amin'ny toetrany mba ho kanto sy tsara izy, ho afaka haneho ny fahatanterahan-toetran'i Kristy. (...)
Tsy mandany andro amin'ny akora tsy misy vidiny Ilay Andriamanitra Mpanefy. Ny vato sarobidy ihany no tefeny hifanaraka amin'ny lapa. (...) Tsy mora izany tefena izany, mandona ny hambom-pon'ny olombelona. Kapain'i Kristy hiala ny fanandramana izay noheverin'ny olona fa tsara tao anatin'ny avonavony. Esoriny izay rehetra mety ho fanandratan-tena. Kantsanany izay mihoatra rehetra, ary ampandaloviny milina fandamana ilay "vato" ka tomoriny akaiky mba ho afaka avokoa ny marokoroko rehetra. Avy eo dia tarafin'ny Tompo amin'ny hazavana ilay vatosoa ka hitany ao ny endriny. Amin'izay vao hambara ho mendrika hanana toerana ao amin'ny tempoly izany vatosoa izany.
Tsara re izany fanandramana izany! Na sarotra aza izany dia manome tombam-bidy vaovao ho an'ilay vato, ka mahatonga azy hazava sy hamiratra! (...)
Manana mpiasa izay nantsoiny avy tao amin'ny fahantrana sy ny fahamaizinana ny Tompo. Milofo amin'ny raharahany andavanandro izy ireo, tsy dia miakanjo tsara, ary tsy misy vidiny eo imason'ny olombelona. I Kristy kosa mahita zava-tsoa tsy hita fetra ao amin'izy ireo; raha eo an-tanany mantsy ireo dia ho tonga vatosoa sarobidy izay hamirapiratra aoka izany ao amin'ny fanjakan'Andriamanitra. "Ary ho rakitra soa ho Ahy ireny amin'ny andro izay hotendreko" hoy Izy. (...)
Hain'Andriamanitra ny fomba itondrana ny fanahy tsirairay. Tsy mitsara tahaka ny fomba fitsaran'olombelona Izy. — UL, t. 372.
Teboka iray manan-danja tokony hataon'ireo izay mandinika ny faminaniana ny famaritana raha toa horaisina ara-bakiteny na ara-keviny ny fomba fiteny ampiasain'ny Baiboly. Ahoana no hamaritana raha toa mamplasa fanoharana ny mpanoratra, ary ahoana no hahalalana ny zavatra tondroin'izany tandindona izany? Tahaka izao ny fomba manan-danja indrindra hanaovana izany: jerena ny fomba nampiasana ilay tandindona manerana ny Baiboly; mifanohitra amin'ny fijerena ny fampiasana ny tandindona iray amin'izao vanim-potoana ankehitriny izao izany. Ohatra, misy olona mahita fa manondro an'i Russie ny sarin'ny bera ao amin'ny Dan. 7 satria matetika io sary io no ampiasaina ankehitriny hoenti-maneho an'i Russie. Tsy fomba azo antoka hanazavana ireo sary an'ohatra ampiasain'ny Baiboly izany.
Diniho ireto toko sy andininy manaraka ireto, ary aoka ny Baiboly ihany no hanazava ny teny ao aminy. Inona ny sary an'ohatra iraisan'ireo toko sy andininy ireo araka ny lohaheviny avy, ary inona no voalazan'ny Baiboly fa tondroin'izany?
Dan. 7:7; Dan. 8:3; Dan. 7:24
………………………………………………………………………….………………………………………
Apôk. 1:16; Efes. 6:17; Heb. 4:12
………………………………………………………………………….………………………………………
Apôk. 12:1; Apôk. 21:2; Efes. 5:31,32; Jer. 6:2
………………………………………………………………………….………………………………………
Rehefa arahina ny fitsipika tsotra, izay mamela ny Baiboly hamaritra ny teny ampiasainy, dia saika tsy misy zava-miafina intsony ao ambadiky ny tandindona ara-paminaniana. Hitantsika, ohatra, fa fahefana ara-pôlitika na firenena iray no tondroin'ny tandroka iray. Maneho ny Tenin'Andriamanitra ny sabatra; ary ny vehivavy dia maneho ny fiangonana. Hitantsika mazava amin'izay fa manazava ny tenany tokoa ny Baiboly.
Misy fanontaniana tokony mbola hovaliana anefa: nahoana Andriamanitra no miteny amin'ny alalan'ny tandindona fa tsy mivantana? Nahoana, ohatra, no tondroin'i Petera amin'ny fomba miafinafina amin'ny hoe "Babylona" ny tananan'i Rôma, ao amin'ny 1 Pet. 5:13?
Mety ho maro ny antony nahatonga an'Andriamanitra nifidy ny hampita hafatra amin'ny alalan'ny tandindona ao amin'ny faminaniana. Raha mahakasika ny fiangonan'ny Testamenta Vaovao, ohatra, raha notondroin'ny Apôkalipsy mazava ho tompon'andraikitry ny faharatsiana maro i Rôma dia azo heverina fa ratsy kokoa noho izay nitranga ny fanenjehana nihatra tamin'ny fiangonana. Na inona na inona anton'izany, dia mahazo matoky isika fa irin'Andriamanitra ny hahatakarantsika ny hevitr'ireny tandindona ireny.
Na dia mitoetra ho zava-miafina aza ny sasany amin'ireo tandindona sy faminaniana, ahoana no mahatonga ny fifantohantsika amin'izay takatsika hanamafy orina ny finoantsika?
"Fa isika tsy nandray ny fanahin'izao tontolo izao, fa ny Fanahy Izay avy amin'Andriamanitra, mba ho fantatsika izay zavatra nomen 'Andriamanitra antsika." - 1 Kôr. 2:12.
Mofon’aina:
Na eto amin' ity fiainana ity aza dia fikasan'Andriamanitra ny hivelaran' ireo fahamarinan'ny Teniny lalandava eo imason'ny olony. Ny fahazavan'ny Fanahy Masina ihany, izay nanome ny Teny, no ahazoantsika fahalalana ny Tenin'Andriamanitra. «Tsy misy mahalala ny ao am-pon ' Andriamanitra, afa-tsy ny Fanahin'Andriamanitra ihany; - fa ny Fanahy mamantatra ny zavatra rehetra, na dia ny saina lalina izay an'Andriamanitra aza» -1 Kôr. 2:10,11. (...) «Raha tonga ny Fanahin'ny fahamarinana, dia Izy no hitari-dàlana anareo ho amin'ny marina rehetra; (...) fa handray avy amin'ny Ahy Izy, ka hanambara izany aminareo» - Jao. 16:13.
Irin'Andriamanitra ny ampiasan'ny olombelona ny fahaizany misaina; ary tsy misy fianarana hafa manatanjaka sy manandratra ny saina tahaka ny fianarana Baiboly. (...) Na izany aza, aoka isika hitandrina mba tsy hanao ny saina ho andriamanitra, izay be fahalemena sy tsy tanteraka amin'ny maha-olombelona. Raha tsy tiantsika ho maizina amintsika ny hevitry ny Soratra Masina, ka tsy ho takatsika ny fahamarinana tsotra indrindra, dia tsy maintsy manana ny fahatsorana sy ny finoan'ny zaza isika, vonon-kianatra sy mitalaho ny fanampian'ny Fanahy Masina. Tokony hampanetry tena antsika ny fahatsapana ny hery sy ny fahendren'Andriamanitra, ary ny tsy fahatakaran'ny saintsika ny fahalehibiazany. Amin-tahotra masina no tokony hanokafantsika ny Teniny, tahaka ny mankeo anatrehany. Rehefa manoloana ny Baiboly isika, dia aoka hanaiky fa misy fahefana ambony noho ny saintsika, ary tsy maintsy miankohoka eo anatrehan'ilay IZAHO IZAY IZY lehibe ny fo sy ny saina. (...)
Fa izay rehetra mankeo amin'ny Baiboly amin'ny toe-tsaina vonona ny hampianarina sy hivavaka (...), mba handinika ny Tenin'Andriamanitra, dia hahazo fahazavana avy amin'Andriamanitra. (...)
Harem-pahamarinana maro no mbola tokony ho hitan'izay mikatsaka amim-pahazotoana. Nampitovin' i Kristy tamin'ny harena miafina ao amin'ny saha iray ny fahamarinana. Tsy hita etST ivelany izy io, fa tsy maintsy trandrahintsika. Tsy dia miankina amin'ny fahaizantsika misaina loatra anefa ny fahombiazantsika eo am-pitadiavana azy, fa amin'ny fanetren-tena sy ny finoana izay hifikitra amin'ny fanampian'Andriamanitra. — TFC, b. 5, tt. 703,704.