Niaraka tamin'i Jaona mpanao batisa ny mpianany roa lahy rehefa nitsangantsangana tsy lavitra teo i Jesôsy. Dia hoy i Jaona: "Indro ny Zanak'ondrin’Andriamanitra " - Jao. 1:36. Efa nihaino ny hafatr’i Jaona momba an'i Kristy izy roa lahy, Izay hahatanteraka ny faminaniana ao amin'ny TT momba ny Mesia ho avy. Nandao an'i Jaona ireo mpianatra ireo mba hanaraka an'i Jesôsy, fantatr izy ireo fa lehibe noho i Jaona mpanao batisa i Jesôsy, ary izy no fahatanterahan'ny hafatr'i Jaona
Vakio ny Jao, 1:35-39. Inona no nataon'ireto mpianatra roa lahy ireto rehefa avy nandre ny fanambaran'i Jaona momba an' i Jesôsy?
Naniry hiaraka amin'i Jesôsy izy ireo, koa niaraka Taminy nandritra ny tontolo andro. Iza no mahalala ireo zava-mahatalanjona nianarany sy niainany tamin’izany?
Inoana fa nanan-danja lehibe izany satria avy hatrany dia naniry hizara ny fanandramany tamin'ny hafa izy ireo. I Andrea, iray amin'ireo mpianatra roa lahy, dia nankany amin'i Simona rahalahiny faingana nanao hoe: "Efa nahita ny Mesia izahay (izay atao hoe, raha adika ny Kristy)."- Jao. 1:42. Rehefa nentin'i Andrea teo amin'i Jesôsy ny rahalahiny dia nasehon'i Jesôsy avy hatrany fa fantany izy. Hoy i Jesôsy: "Hianao no Simona, zanak'i Jaona; hianao hatao hoe Kefasy." - Jao. 1:42. Mahalala sy mahafantatra tsara an'i Petera i Jesôsy. Hevitra voizin'iJaona ao amin'ny filazantsarany io fahafantaran'i Jesôsy ny olona iray io. (Jereo ohatra ny Jao. 2:24,25).
"Raha nanana ny toe-tsaina tsy mino nisy teo amin'ny mpisorona sy ny mpanapaka i Jaona sy Andrea, dia tsy ho hita nianatra teo an-tongotr’i Jesôsy izy. Ho tonga hanao fanakianana sy hitsara ny teniny fotsiny izy ireo. (...) Tsy toy izany anefa no nataon'ireo mpianatra voalohany. Efa namaly ny antson'ny Fanahy Masina izy teo amin'ny fitoriana nataon'i Jaona Mpanao batisa. (...) Nisy fanazavana avy tamin'Andriamanitra nitosaka teo amin'ny fampianarana Soratra Masina ao amin'ny Testamenta Taloha." - IFM, t. 98 (ed. 2023).
Ny fanazavana ny hoe iza moa i Jesôsy no ifantohan'ny filazantsaran'i Jaona manontolo, mba ho voambara amin'izao tontolo izao izany vaovao mahafaly izany.
Ahoana no nanovan'i Kristy, na ny finoana an'i Kristy, ny fiainanao? Inona koa ireo fiovana mbola tianao hitranga?
"Fa matoky aho fa na fahafatesana, na fiainana, na anjely, na ireo fanapahana, na zavatra ankehitriny, na zavatra ho avy, na hery, na ny ambony, na ny ambany, na inona na inona amin 'izao zavatra ary rehetra izao, dia tsy hahasaraka antsika amin'ny fitiavan'Andriamanitra izay ao amin'i Kristy Jesôsy Tompontsika." - Rôm. 8:38,39.
Mofon’aina:
Azon'i Kristy natao ny nanalavitra antsika noho ny helotsika, saingy tsy izany fa tonga nonina teto amintsika aza Izy, Izay manana ao Aminy ny fahafenoan'Andriamanitra rehetra, mba ho iray amintsika, mba ho tonga amin'ny fahatanterahana isika noho ny fahasoavany. Tamin'ny fahafatesana mahamenatra sy fijaliana no nanavotany ny olombelona. Fitiavana sy fahafoizan-tena re izany! (...) Tsy misy maharefy ny halalin' izany fitiavana izany. (...) Tian'Andriamanitra haneho ny toetrany sy hanao ny asany ny zanany, mba ho voataona hiray saina amin'Andriamanitra koa ny hafa.
Tonga ota ho famonjena ny taranaka lavo i Kristy Mpamonjintsika, Ilay tonga lafatra tanteraka. Tsy nahalala ota Izy satria tsy nanota, kanefa dia nizaka ny vesatra mahatsiravin'ny helok'izao tontolo izao. Natao sorona ho antsika Izy mba ho tonga zanak'Andriamanitra izay rehetra mandray Azy. (...) Nanao izay hitaomana ny olona rehetra hanatona Azy i Kristy tamin'ny alalan'ny hazo fijaliana. Ny fahafatesany no hany fanantenana hahazoana mamonjy ireo izay latsaka anatin'ny fangidiana noho ny fahotana. Natao handray hery vaovao ara-tsaina sy ara-panahy amin'ny alalan'ny Fanahy Masina ny olona, izay raha miara-miasa amin'Andriamanitra dia ho tonga iray amin'Andriamanitra.
Mba handravana ny sakana napetrak'i Satana eo anelanelan' Andriamanitra sy ny olona dia nanao sorona ampy sy tanteraka i Kristy, naneho fandavan-tena tsy misy toy izany. Nampiseho fahagagana tamin' izao tontolo izao Izy, dia Andriamanitra tonga olombelona sy nanao sorona ny tenany ho famonjena ny olona lavo. Fitiavana mahatalanjona re izany! Mitomany aho eo am-pieritreretana fa maro tokoa ireo izay milaza ho mino ny fahamarinana no milona ao anatin'ny fitiavan-tena (...).
Gaga aho mahita ireo izay mitonona ho Kristianina kanefa tsy manararaotra ny fanomezan'ny lanitra, sy tsy mahita mazava fa ny hazo fijaliana no mitondra famelan-keloka sy mampifandray mivantana ny fo (...) amin'ny Fanahy Masina. UL, t.191.
"Ary hianareo dia tanteraka ao Aminy, sady Izy no Lohan'ny fanapahana sy ny fahefana rehetra. " - Kôl. 2:10.
Mofon’aina:
Tsy maintsy miaina eo ambany tara-pahazavana mitosaka sy mafanan'Ilay Masoandron'ny fahamarinana isika. Tsy misy afa-tsy ny fitiavany be fangorahana sy ny fahasoavany ary ny heriny tsitoha no ahafahantsika miady amin' ilay fahavalo tsy mifaditrovana sy mampilefitra ny fon'ny olombelona be fanoherana. Inona no herintsika? Ny fifaliana ao amin'ny Tompo. Aoka hameno ny fontsika ny afo mandevon'ny fitiavan'i Kristy, dia halemy fanahy sy handefitra isika, ho vonona handray ny hery izay nomaniny ho antsika.
Aoka hisaotra an'Andriamanitra isan'andro isika noho ireo fitahiana izay antsika. Raha manetry tena eo anatrehan'Andriamanitra ny olombelona, ka mahatsapa fa tsy mety tokoa ny mikolokolo toe-tsaina miavona tsy mila fanampiana, ary mahita fa tsy manan-kery na kely aza izy hanao ny asa tokony hatao ho fanadiovana ny fanahiny, ka tsy mihevi-tena ho marina velively, dia hataon'i Kristy tombo-kavatsa eo amin'ny fanahiny ny endriny (endrik'i Kristy). (...)
Tsy mba hataon'i Kristy tsirambina ny asa apetraka eo an-tanany. Hataony tsapan'ny mpianany mahafatra-po ny faharatsiana sy ny fahalotoan'ny fony noho ny fahotana, ary ny fahasimban'ny fo izay iasany. Izay mibebaka marina dia mahafantatra fa tsy misy ilana azy ny fanandratan-tena. Rehefa mampitaha ny fahalemen'ny tenany amin'ny toetra tonga lafatry ny Mpamonjy izy dia hiteny hoe: tsy manan-java-tsoa azo atolotra aho, fa ny hazo fijalianao no amikirako.
Hilaza toa an'i Isaia izy hoe: "Jehovah ô, manorina fiadanana ho anay Hianao; fa ny asanay rehetra dia tanterahinao ho anay. Jehovah Andriamanitray ô, tsy Hianao ihany no efa nampanompo anay, fa tompo hafa koa; nefa Hianao irery ihany no ahazoanay mankalaza ny anaranao." — Isa. 26:12,13.
Izay mikatsaka ny fahamarinana ka mibanjina an'i Kristy mba ho tonga tahaka Azy dia mahita ny fahatanterahan'nylalàn'Andriamanitra, ary manjary tsy afa-po na amin'inona na amin'inona afa-tsy amin'ny fahatanterahana ihany. Afeniny ao amin'ny fiainan'i Kristy ny fiainany ka hitany fa miseho eo amin'ny toetran'i Kristy ny fahamasinan'ny lalana, koa ampitomboiny hatrany ny ezaka mba ho tahaka Azy. Aoka hivonona hiady amin'ny fotoana rehetra satria hitan'ilay mpaka fanahy fa very ny iray amin'ny olony. UL, t. 238.