Lohahevitra manan-danja ao amin'ny bokin'ny Apôkalipsy ny fiankohofana. Antsoina hoe "dragona" ilay tompon'ny fiankohofana sandoka sy mpitaona ny olona ho amin'izany (Apôk . 13:2-4), ary tsy kisendrasendra ny amaritana azy ho menarana. Mampahatsiahy antsika mazava ny tao Edena izany, izay nitaoman'ny menarana an'i Adama sy i Eva hanaraka azy ao anatin'ny fikomiany amin'ny Mpahary.
Ampitahao ny Gen. 3:1-5 sy ny Apôk. 12:1-9. Inona ny lohahevitra Itovian'ireo tantara roa ireo? Diniho ireo tsipiriany omena antsika momba ny menarana ao amin'ny Genesisy; ahoana no anampian'izany antsika hahafantatra ireo olana sasantsasany nahatonga ilay ady tany an-danitra voalaza ao amin'ny Apôkalipsy?
Misy tantara anankiroa ao amin'ny Soratra Masina, izay amitahan'i Satana an'izao tontolo izao: ao amin'ny Genesisy, izay tsy ahitana afa-tsy olona roa; ary ao amin'ny Apokalipsy, izay ilazana an'i Satana hoe: "izay mamitaka izao tontolo izao" - Apôk. 12:9, sy mitaona "ny tany rehetra" hiankohoka aminy (Apôk. 13:2-4). Anisan'ny lohahevitra hita ao amin'ny faminaniana ara-Baiboly ny toetra tsy miovaova ananan'ilay fifanandrinana lehibe. Tsy miova ny toetran'Andriamanitra sy ny Teniny, tahaka izany koa ny fikasan'ny devoly.
Soa ihany fa noho io toetra tsy miovaovan'ilay fifanandrinana lehibe io, ary satria koa misy filazana mazava ao amin'ny faminanian'ny Soratra Masina, dia azon'ny Kristianina avahana tsara ireo fironana isan-karazany, ary manjary hitany ireo fandrika ara-panahy amelezana azy. Tsy hiova mihitsy ny toetran Andriamanitra, ary toy izany koa ny devoly. Mety hanova ny endriny injato inarivo i Satana, kanefa ny tantaran'ny fahalavoan'ny olombelona tao anatin'ny arivo taona maro, sy ny voalazan'ny faminaniana ao amin'ny Apôkalipsy, dia manaporofo fa tsy miala amin'ilay drafitra efa narahiny hatrany Edena mihitsy izy. Nampanantena fahendrena sy fahaiza-manavaka antsika Andriamanitra (Jak. 1:5), ary satria azontsika antoka ny Soratra Masina dia tsy voatery ho latsaka ao amin'ny fandriky ny laingan'ny devoly isika. Indrisy anefa fa marobe ireo efa latsaka tamin'izany, ary marobe koa no mbola ho latsaka.
Eritrereto ny amin'ny fivoaran'ny kolontsaina araka ny fandehan'ny fotoana. Miova ireo fifsipika eo amin'ny fiarahamonina; ireo zavatra azo nekena fahiny manjary tsy azo ekena ankehitriny, na ny mifamadika amin'izany. Raha fantatra fa tsy miova ireo lohahevitra sy ireo mpandray anjara amin'llay fifanandrinana lehlbe, Inona no tokony ho ao an-tsain'ny Kristianina eo am-pandinihany ny fiovaovan'ny kolontsaina? Aiza ho aiza ao amin'ny kolontsaina misy antsika ankehitriny, ohatra, no ahitana ilay laingan'ny devoly tany am-piandohana hoe: "Tsy ho faty tsy akory hianareo" sy ny hoe: "ho tahaka an'Andriamanitra hianareo"?