Vaovao Madagasikara

    Actualités mondiales

    Fiambenana maraina

    "Mba tsy hisy fisarahana eo amin'ny tena, fa mba hifampiahy ny momba ny tena rehetra." - 1 Kôr. 12:25. 

    Mofon'aina:

    Ny firaisan-kina no hery fa maha-osa kosa ny fisaratsarahana. Rehefa misy firaisana eo amin'ireo izay mino ny fahamarinana ankehitriny dia mahery vaika ny hery miasa mangina avy aminy. Takatr'i Satana tsara izany. Tsy mbola nisy tahaka ny amin'izao andro izao ny fahavononany hampandamoka ny fahamarinan'Andriamanitra ka ataony izay hisian'ny fangidiana sy ny fifandirana eo amin'ireo vahoakan'Andriamanitra.

    (...) Raha misy ny fotoana tokony hiraisan'ny vahoakan'Andriamanitra dia izao ankehitriny izao izany. Napetrak'Andriamanitra tamintsika ny fahamarinana voatokana ho an'izao andro izao izay natao hampahafantarina an'izao tontolo izao. Efa alefa ankehitriny ny hafa-pamindrampo farany. Lehilahy sy vehivavy maro izay handalo fitsarana no manoloana antsika ankehitriny. Manao ahoana re no tokony hitandremantsika amin'ny teny sy ny asa rehetra ataontsika mba hanahafantsika Ilay Môdely, mba hahatonga ny ohatra asehontsika hitarika ny olona ho eo amin'i Kristy. Endrey, manao ahoana no tokony hitandremantsika fatratra rehefa maneho ny fahamarinana amin'ny hafa izay mety ho voatarika handray izany noho ny fibanjinany ny fahatsorany sy ny fahatsarany. Raha miseho eo amin'ny toetrantsika ny hery manamasin'izany fahamarinana izany dia hitoetra ho fahazavana ho an'ny hafa isika ho espistily velona fantatry ny olon-drehetra sy vakiny. Tsy azontsika atao ny hanome toerana ho an'i Satana amin'izao fotoana izao ka hankamamy ny fisaratsarahana sy ny fifandirana ary ny adilahy.

    Ny hisian'ny firaisana sy ny fifankatiavana eo amin'ireo mpianatra no fangatahana namonto ny vavaka farany nataon'ny Mpamonjy nialoha ny nanomboana Azy tamin'ny hazo fijaliana. Tsy mba ho an'ny Tenany no nanaovany fangatahana tao anatin'ny hirifirin'ny hazo fijaliana natrehiny fa ho an'ireo izay hilaozany mba hamita ny asany eto amin'izao tontolo izao. 

    (...) Ireo efa nahazo tombontsoa tamin'ny asan'ireo mpanompon'Andriamanitra dia tokony hikambana amin'izy ireny, araka izay fahafahana ananany, ho famonjena ireo fanahy maro. Izany no asan'ny tena mpino marina sy ny mpitandrina ary ny vahoakan'Andriamanitra.

    (...) Tsy hanao tsirambina ny asa mafy mba hampahatanjaka sy hampisy ny firaisana ao amin'ny fiangonana izy ireo. Hiambina fatratra izy mba tsy hisy ny hirika hidiran'ny fifankahalana sy ny fisaratsarahana.- TFC, b. 5, U. 236,238

    Fiambenana maraina

    "Ataovy izay hihavananao amin 'ny rahalahinao, ary rehefa miverina, dia vao atero ny fanatitrao ." - Mat. 5:24.

    Mofon'aina:

    Ireo voatendry hiambina ny fahalianan ' ny fiangonana amin'ny zava-panahy dia tokony hitandrina fatratra mba haneho ohatra tsara, tsy tokony hanome toerana ny fitsiriritana sy ny fialonana na koa ny fiahiahiana ny hafa izy ireo fa haneho mandrakariva ny toe-tsain'ny fitiavana sy ny fanajana ary ny fahalemem-panahy, izay iriny hampirisihina mba hananan'ireo mambran'ny fiangonana. Aoka hifantohana tsara ireo torolalan'ny tenin'Andriamanitra. Aoka hofehezina ny fihetsika rehetra maneho fankahalana na faharatsiam-panahy ary aoka hongotana ny faka mangidy rehetra. Tokony harahina amin'ny fomba hentitra ny fitsipiky ny Mpamonjy rehefa misy olana teraka eo amin'ireo mambran'ny fiangonana. Aoka hatao ny ezaka rehetra mba hisian'ny fampihavanana; raha toa ka mikiribiby hitoetra ao amin'ny fifandirana anefa ny andaniny sy ny ankilany dia tokony haato amin'ny andraikiny mandra-pisian'ny firindrana eo amin'izy ireo.

    Eo anatrehan'ireo fizahan-toetra miseho eo anivon'ny fiangonana, aoka ny mambra rehetra handinika ny fony mba hahitany raha toa avy aminy ny anton'ny olana. Mety hitondra fikorontanana ao am-piangonana ny avonavona ara-panahy, ny faniriana hanjakazaka, ny faniriana feno avonavona hahazo voninahitra na hahazo toerana, ny tsy fahaizana mifehy tena, ny fampanaranana ny fironana ambany sy ny fitsaratsarana ary ny tsy fahaizana mandanjalanja.

    Ireo tia mifosafosa matetika no miteraka toe-java-tsarotra, manapoizina ny saina tsy miambina ary mampisaraka ny mpisakaiza akaiky indrindra amin'ny resaka bitsibitsihiny sy ny soso-keviny izy ireo. Manampy trotraka ireo mpitondra fikorontanana ireo eo amin'ny asa ratsy ataony ireo olona maro vonon-kihaino izany sy ireo fo ratsy izay manao hoe: "Tantarao, (...) dia hotantarainay." Tsy tokony hekena eo amin'ireo mpianatr'i Kristy izany fahotana izany. Aoka tsy hisy ray aman-dreny kristianina hanaiky ny hamerenana ao an-tokantrano ny fifosana na koa ireo fanamarihana natao hanalam-baraka ny mambran'ny fiangonana.

    Tokony horaisin'ny Kristianina ho adidy masina ny hanohitra ny toe-tsain'ny fitsiriritana na ny fifaninana feno fialonana. Tokony hampifaly azy ireo aza ny laza tsara ananan'ny rahalahiny na ny fahombiazany na dia toa latsaka aza ny toetrany na koa ny zava-bitany eo anatrehan'izay an'ny rahalahiny (...) - TFC, b. 5, tt. 241,242

    Telovolana 3: Ao amin'ny memy miaraka amin'i Kristy
    Lesona 8: Mahita izay tsy hita

    Vakio ny "Tamin'ny andron'i Estera mpanjakavavy", ao amin'ny MM, toko 49.

    "Tsy efa niteny ve Andriamanitra fa hanome ny Fanahy Masina ho an' izay rehetra mangataka Aminy? Ary moa ve tsy tena misy marina sy tena mpitari-dalana tokoa io Fanahy Masina io? Toa matahotra ny handray an'Andriamanitra amin'ny teniny ny olona sasany, toy ny hoe sahisahy foana izy raha manao izany. Mivavaka izy ireo mba hampianaran'Andriamanitra antsika, kanefa matahotra ny hino ny teny fikasany izy, sy ny hino fa Izy marina no nampianatra antsika. Raha manatona amim-panetren-tena ny Raintsika isika, vonona sady maniry fatratra ny hampianarina, nahoana isika no misalasala ny amin'ny fanatanterahan'Andriamanitra ny teny fikasany? Tsy tokony hiroaroa saina ny Aminy isika na kely aza ka hanjary hanala baraka Azy. Rehefa nikatsaka hahalala ny sitrapony ianao, ny anjaranao dia ny mino fa hoentina sy hotarihina ary hotahina ianao ho amin'ny fanatanterahana ny sitrapony. Mety tsy hatoky ny tenantsika isika sao diso fandray ny fampianarany; kanefa ataovy antom-bavaka izany ary matokia Azy hatramin'ny farany, fa hitarika anao ny Fanahiny Masina mba hahatakaranao araka ny tokony ho izy ny drafiny sy ny fitondrany. " — MR, b. 6, t. 225.

    "Mihamatanjaka ny finoana rehefa miady amin'ny fisalasalana sy ny fitaoman-dratsy. Ny traikefa azo avy amin'izany fitsapana izany dia manana tombam-bidy lehibe lavitra noho ny firavaka sarobidy indrindra." — TFC, b. 3, t. 555.

    FANONTANIANA HIFANAKALOZAN-KEVITRA:

    1. Resaho ao amin'ny kilasy ny amin'ireo zavatra izay inoantsika kanefa tsy hitantsika, zavatra izay fantatsika tsara fa manam-pisiana kanefa tsy tazan'ny masontsika. Ahoana no anampian'izany antsika hahatakatra ny hevitry ny hoe: "mahita izay tsy hita"?

    2 Ifanakalozy hevitra ny amin'ilay fanontaniana farany ao amin'ny lesona Alarobia. Impiry no efa nandalo fanandramana toy izany isika? Inona no azontsika atao mba hahatonga antsika hatoky fa ny hevitr'Andriamanitra no tsara indrindra, na dia tsy araka izay antenaintsika aza izany?

    3 Raha "mihamatanjaka ny finoana rehefa miady amin'ny fisalasalana sy ny fitaoman-dratsy", ka zavatra tena lafo vidy izay "manana tombam-bidy lehibe lavitra noho ny firavaka sarobidy indrindra" no vokany, Inona no tokony ho fiantraikan'izany eo amin'ny fomba fijerinao ny ady toy izany?

    4 Ny ankamaroantsika dia efa nahita olona, eny Kristianina toa antsika aza, izay nandalo toe-java-tsarotra ka nampivarahontsana ny vokany, farafahakeliny amin'ny fomba fijerintsika. Ny ratsy izay efa nampoizintsika indrindra no nitranga na dia teo aza ny vavaka sy ny ezaka rehetra efa natao. Ahoana no fahazoantsika izany araka ny lesona nianarantsika?

    Please publish modules in offcanvas position.