April 2025

Hodinihina mandritra ny herinandro: Gen. 10:1-12; Gen. 12:1-9; 1 Sam. 8:4-18; Mat. 20:25-28; Apôk. 18:1-4.

Tsianjery: "Ary nomena fanapahana sy voninahitra ary fanjakana Izy, mba hanompoan'ny fokom-pirenena sy ny firenena ary ny samy hafa fiteny rehetra Azy; ny fanapahany dia fanapahana mandrakizay ka tsy ho tapaka, ary ny fanjakany tsy ho rava." - Dan. 7:14.

Vakio ny VM, toko 58: "Ny Apôkalipsy", tt. 513-516.

Ny ankamaroan'ny fivavahan'izao tontolo izao dia mianina amin'ny fanazavana hevitra; misy fiavahana lehibe kosa ny fivavahana Kristianina, izay miorina lalina amin'ny tantara. Tantaran'ny fifandraisan'Andriamanitra amin'ny olombelona eo amin'ny tantara manontolo ny Baiboly, ary ny fandinihantsika izany fifandraisana nandritra ny arivo taona maro izany dia mampianatra zavatra betsaka antsika momba ny toetran'Andriamanitra tsy miovaova.

Lohahevitra manan-danja ao amin'ny bokin'ny Apôkalipsy ny fiankohofana. Antsoina hoe "dragona" ilay tompon'ny fiankohofana sandoka sy mpitaona ny olona ho amin'izany (Apôk . 13:2-4), ary tsy kisendrasendra ny amaritana azy ho menarana. Mampahatsiahy antsika mazava ny tao Edena izany, izay nitaoman'ny menarana an'i Adama sy i Eva hanaraka azy ao anatin'ny fikomiany amin'ny Mpahary.

Azo inoana fa ny lafiny mahatsiravina indrindra amin'ny fiainana eto amin'izao tontolo izao, izay tafasaraka amin'ny Mpahary azy, dia ny fahafatesana miandry ao ambadiky ny fiainana tsirairay, vonona hamely amin'ny fotoana rehetra. Izany no "tambin'ny ota", sazy aloantsika noho ny fisarahana amin'llay Loharanon'aina tokana eto amin'izao tontolo rehetra izao, dia ny Mpahary.

Ao amin'ilay tantara nilazana voalohany ny amin'ny fitiavana ihany, dia ao amin'ny Gen. 22, no ahitana voalohany koa ny hoe seh (teny hebreo nadika hoe: "ondry" na "zanak'ondry"). Hita mazava fa anisan'ny tandindona resahina matetika indrindra ao amin'ny bokin'ny Apokalipsy ny "zanak'ondry", izay iantsoana an'i Jesôsy ao mihoatra ny in-20.

Ny nandovantsika toetra mpanota dia anisan'ny midika fa misy fahasimbana ny fomba fijerintsika izao tontolo izao noho ny fironantsika ho amin'ny fitiavan-tena sy ny avonavona. Ny fomba fijerintsika voafetra no ahitantsika izao tontolo izao, fa tsy ny fomba fijerin'Andriamanitra mahalala ny zavatra rehetra (mazava loatra). Azo inoana fa ny fanehoana ny hevitry ny "fitiavana" no nodisoin'ny olombelona mpanota indrindra. Ny hevitry ny fitiavana voizina ao amin'ny kolontsain'ny besinimaro dia mirona ho amin'ny fanomezana fahafaham-po ny tena manokana fa tsy ny hafa.

Ny ankamaroan'ny fandaharam-pianarana any amin'ny oniversite dia manomboka amin'ny taranja ankapobeny (matetika omena ny laharana "101"), taranja mahafaoka Ireo foto-kevitra ankapobeny manan-danja, izay ho fototra iaingan'ny fianarana lalindalina kokoa arakaraka ny irosoana ao anatin'ilay lohahevitra. Toy izany koa, rehefa mamaky ny Baiboly manontolo isika, dia hahita fa manana taranja ankapobeny koa Andriamanitra ao amin'ny bokin'ny Genesisy, izay ampidirany hevitra izay hodinihina amin'ny tsipiriany kokoa manerana ny Baiboly manontolo.